සෙනසුරාදා උදේ පාන්දරම ටාරා නෝනා වැඩ පටන් ගත්තා. සිරි පොද වැස්ස නිසා කම්මැලියො ඔක්කොම තාම ඇඳන් වලට වෙලා පොරවගෙන දොයි, හැමෝම ටාරා නෝනා වගේ කඩිසර නැහැ නේ… අනේ ටාරා නෝනටත් තනියම වැඩ කරගන්න අමාරුයි. ඉතින් එයා උදව්වක් ගන්න හිතාගෙන කොම්පීතර අප්පු ව නැගිට්ටෙව්වා…. කොම්පීතර අප්පුත් වස කම්මැලියා වෙලාද කොහෙද දෙතුන් පාරක් කීද්දුවම තමා ලයිට් දාලා ඇහැරෙන්න හැදුවේ…ඒ උනාට මොකෝ කොම්පීතර අප්පුට නැගිට ගන්න බෑ. ඊයේ මගුල් ගෙදර ගිහින් කොම්පීතර අප්පුට මහන්සි ද මන්ද කියල ටාරා නෝනා කල්පනා කලා. එතකොටම එයාට මතක් උනා කොම්පීතර අප්පු මගුල් ගෙදර ගියෙ නෑනෙ කියලා…
කොම්පීතර අප්පු තව පාරක් නැගිටින්න හැදුවා… ඒත් ඉතින් ලයිට් එක දානවා විතරයි නැගිට ගන්න බැහැ. බැරි අමාරුව වැඩි වෙලාද කොහෙදෝ කීක්… ගාලා කෙඳිරිත් ගානවා.
මේක බලන් ඉඳලා හරියන ලෙඩක් නෙමෙයි" කියල හිතපු ටාරා නෝනා ගියා කොම්පීතර අප්පු ට බෙහෙත් ටිකක් ගන්න යන්න උදව්වට කෙනෙක් හොයා ගන්න. එතකොටම එතනට ආවා භූතාක්ෂණ මාමා…
"අනේ භූ අය්යේ මේ බලන්නකෝ… අපේ කොම්පීතර අප්පුට සනීප නැහැ නේ. මම මේ බෙහෙත් ටිකක් අරන් දෙන්න දොස්තර මහත්තය ව ගෙන්නන්න හැදුවේ" ටාරා නෝනා කිව්වා.
"හා හා ටාරා නෝනේ අද සෙනසුරාද කොහෙද දොස්තර???"
හැබෑ නේන්නම් කොම්පීතර විශේෂඥ දොස්තර මහත්තයා සෙනසුරාදට ලෙඩ්ඩු බලන්නේ නැති විත්තිය ටාරා නොනට මතක් උනේ එතකොටයි.
" අනේ අය්යේ දරුවෙක් වගේ ඉන්න කොම්පීතර අප්පු ලෙඩ උනාම බලන් ඉන්න පුලුවන් ද? අනික මට කොම්පීතර අප්පුත් එක්ක කරන්න වැඩ ගොඩකුත් තියෙනවා. " ටාරා නෝනා දුක් උනා.
"ටාරා නෝනට ඕනම නම් මම පොඩ්ඩක් ගොඩ වෙදකමක් වත් හරියයි ද බලන්නද??? මෙහෙම හිටියට අපිත් ඔය කොම්පීතර් විශේෂඥ විභාගෙට ඉගන ගත්තු උදවිය. විභාගෙට වාඩි නොවුනට " භූතාක්ෂණ මාමගේ යෝජනාවට ටාරා නෝනගේ ඉහේ මල් හතක් පිපුනා වගේ. එයාට ඕන උනේ කොහොම හරි කොම්පීතර අප්පු ව සනීප කර ගන්න.
ඉතින් භූතාක්ෂණ මාමා කොම්පීතර අප්පු ව පරීක්ෂා කලා.
" ලෙඩේ නම් ටිකක් බරපතලයි වගේ ටාරා නෝනේ, ඔපරේසොමක් ම කරන්න වෙයි වගේ…"
භූතාක්ෂණ මාමා රෝග විනිශ්චය කරා.
" දැනට ඕනම නම් ගොඩ වෙදකමක් කරන්න පුලුවන්. හැබැයි දොස්තර මහත්තයට පෙන්නන්න වෙයි සඳුදා දිහාවේ"
ටාරා නෝනා ගොඩ වෙදකම කරන්න කැමති උනා. ඒකත් පොඩි පහේ ඔපරේසමක් තමයි. කවුද ඔපරේෂන් කරද්දි තියෙටර් එකේ ඉන්න දෙන්නේ නෑනේ. ඉතින් ටාරා නෝනා එළියට ගියා.
ටාරා නෝනා ආපහු එද්දි මෙන්න කොම්පීතර අප්පු ඉන්නවා අමාරුවෙන් හිනා වෙවී…
හැබැයි භූතාක්ෂණ මාමා කරලා තිබුන ගොඩ වෙදකම දැක්කම නම් ටාරා නෝනට තරු පෙනුනා…!!!
ෆෑන් එක දාලා??? කොම්පීතර අප්පුට…??? A/C එකත් හරෝලා ඒ පැත්තට…???
භූතාක්ෂණ මාමා නම් කිව්වේ processor එකේ heatsink එකේ වරදකින් කොම්පීතර අප්පුට උණ ගැනිලා තිබුණ නිසා උණ බස්සන්නයි දිගටම වැඩ කරද්දි ආපහු උණ හැදෙන එක නවත්තන්නයි ඔය බේත අත්දුටුවයි ප්රතයක්ෂයි කියලා… අනේ ඉතින් ටාරා නෝනා දන්නවයැ කොම්පීතර වෙද හෙද කම්.
